Astrononmie

De Wikipedia
Ch't' articl'ye fut c'menchie en Jèrriais


L'astrononmie Chinnouaise 'tait bein avanchie

L' astrononmie (audgo astrononmie}est la scienche tch'êtudie chein tch'est dans l'ciel hors l'atmosphéthe d'la Tèrre. Oulle êtudie les plianètes, les leunes, les conmètes, les êtailes, les galaxies et tout chein tch'est dans l'espace.

Chutte scienche est bein ancienne, car dans les touos vièrs temps les gens r'gardaient l's êtailes et coumme tchi qu'lé solé r'muait dans l'ciel s'lon les saîsons. Nou-s'a proposé qu'des pouquelayes coumme Stonehenge fûtent bâties pouor êpier les solstices et l's êtchinnoxes.

La pliaich'chie d'êtailes sus des cartes 'tait împortante pouor les cheins tchi viageaient en dans des batchieaux. Nou soulait navidgi par lé solé et l's êtailes. À seule fîn d'èrconnaître les êtailes, nou dêcrivait des constellâtions, des portraits d'pèrsonnes et d'bêtes dans l'ciel. Ch'est des portraits înmaginnaithes, car à vrai dithe les êtailes dans les constellâtions n'ont rein à faithe les ieunes auve les aut's.

Les C'mîns d'Saint Jacques sont not' galaxie - qu'nou vait dans l'ciel la niet

L'astrologie est la crianche qué l'mouvement d's êtailes a eune înfluence sus la vie des gens et d's êvènements sus Tèrre. Ch'est les cheins tchi chèrchaient des sîngnes dans l'ciel tchi gardaient les preunmié r'cords dé changements dans l's êtailes – des supèrnouvelles êtailes, des conmètes et d's êclyipses.

L'învention du téléscope donnit l'opporteunité d'êtudier les plianètes et d'dêcouvri des nouvelles leunes à l'entou d'ches plianètes.

Des nouvelles théories sus l'système solaithe changîtent la connaîssance des gens entouor l'Unnivèrs et l'originne d'la Criâtion.

Viyiz étout[amendaer | modifier le wikicode]