Salle pârouaîssiale

Cotentinais : salle parouessiale
Jèrriais : Salle pârouaîssiale ( Salle pârouaîssiale)

Ch't' articl'ye fut c'menchie en Jèrriais

Eune salle pârouaîssiale est l'siège dé l'adminnistrâtion meunicipale en Jèrri. Toutes les pâraisses dé Jèrri ont eune salle pârouaîssiale excepté Saint Martîn, tch'a eune salle publyique.

Jusqu'en 1804, l's assembliées d'pâraisse lus rêunnissaient dans l'églyise pârouaîssiale et l's êlections prannaient pliaiche dans l'églyise étout. Tout chenna avait l'êffet d'excliuthe les Méthodistes et les Catholiques et touos les cheins tchi n'allaient pon ès églyises Anglyicannes.

En 1804 eune louai distîndgit l's assembliées ecclésiastiques d'auve les assembliées civiles. L's assembliées d'pâraisse quémenchîtent d'lus r'muer d's églyises. Par exempl'ye les assembliées d'pâraisse à Saint Ouën n'lus rassemblyîtent d'aut' dans l'églyise auprès 1806. L's assembliées lus rêunnissaient dans d's aubèrges, des maîsons ou des salles.

Eune louai d'1831 sus l's êlections abolit la couôteunme d'aver l's êlections les Dînmanches dans l'églyise. L's êlections éthaient lieu dans les salles d'la Milice ou dans l'marchi duthant la s'maine.

Eune louai d'1842 c'mandit qu'les assembliées et êlections n'fûssent d'aut' annonchies dans l's églyises, mais qu'un avis sait affichi dans la boête officielle dé l'églyise à seule fîn d'annonchi l's assembliées et l's êlections, et v'là tch'est acouo l'cas au jour d'aniet.

Avaû l's années les pâraisses bâtitent des salles pouor lus affaithes (Saint Martîn acceptit des sou d's Êtats d'Jèrri pouor la bâtithie en 1887 d'eune salle dans tchi des rêunnions publyiques pouôrraient prendre pliaiche - né v'là pouortchi la salle dé Saint Martîn est eune salle publyique au run d' pârouaîssiale).

La salle pârouaîssiale dé Saint Hélyi (1872, architectes Le Sueur et Brée) contcheint l'ex-P'tite Cour et d's aîtres pouor les prisonnièrs.

La salle pârouaîssiale dé Saint Brélade à Saint Aubîn soulait êt' la stâtion du c'mîn d'fé.