Chocolat

De Wikipedia
Ch't' articl'ye fut c'menchie en Jèrriais
Des chocolats

chocolat (Guernésiais : tchoceuleutte) est un fricot grée d'pais d'coco. Nou fait sèrvi du chocolat dans d'la chucrinn'nie, d'la gâchinn'nie, des galettes et d'aut's fricots.

Les pais d'coco veinnent d'l'arbre cocoyi (Theobroma cacao) tch'a s'n originne en Améthique du Nord (Mexique). Les pais sont fèrmentés, rôtis et stchis. Lé beurre dé coco est s'pathé du mar par l'êtamp'sie.

  • Lé nièr chocolat est grée atout du mar d'coco et ofûche du beurre dé coco et du chucre.
  • Lé chocolat au lait est grée atout du mar d'coco, du beurre dé coco, du chucre et du lait en poudre.
  • Lé blianc chocolat est grée atout du beurre dé coco, du chucre et du lait en poudre.

Nou-s'y ajouôte parfais d'la vannil'ye ou d'aut's agouôtages.

Lé chocolat avait 'té consonmé coumme bouaisson en Améthique d'pis des siècl'yes, ofûche des millénaithes, d'vant l'arrivée d's Ûropéens. Lé mot chocolat veint probabliément dé xocolatl (ieau améthe en Nahuatl). L's Améthitchains d'chu temps-là b'vaient l'chocolat auve du pînment. L's Espangnos rapportîdrent lé chocolat en Ûrope au 16e siècl'ye. L's Ûropéens s'faichonnîdrent à la béthie d'chocolat en rempliaichant l'pînment d'auve d'la vannil'ye, du chucre et du lait.

Pouor la fîn du 18e siècl'ye nou-s'înventit eune manniéthe dé faithe du chocolat en blio. La preunmié barre dé chocolat pouor mangi fut vendue en 1847 en Angliétèrre.

Les deux tchièrs d'la production d'coco du monde veint d'l'Afrique, et la Côte d'Iviéthe en produit dans la maîntchi.

Y a co' de quei à vei' ou à ouï' entou'
l'chocolat
sus les Coumuns à Viquipédie