Rome

De Wikipedia
Ch't' articl'ye fut c'menchie en Jèrriais


Lé Colossée est iun des mèrs touristiques d'la ville dé Rome

Rome (en Italien: Roma) est la capitale d'l'Italie. Y'a dans les 2.8 millions d'habitants (les Romains). La grande ville contcheint la Cité du Vatican, un p'tit êtat îndépendant d'pis 1929 tch'est l'siège du Pape et l'Églyise Catholique Romaine. La grande ville est mênommée la Cité Êtèrnelle.

La ville est toute plieinne dé vielles statues et d'monuments et d'architectuthe.

Histouaithe[amendaer | modifier le wikicode]

S'lon la légende, Romulus et Rémus fûtent nouôrris par eune feunmelle loup

S'lon la légende, Rome fut fondé par les jeunmieaux, Romulus et Rémus, lé 21 d'Avri 753 d'vant l'Christ. Romulus fut l'preunmié rouai d'Rome. Mais ch'est probabl'ye qu'la contrée fut settlée par des gens dans les mille ans d'vant l'Christ. La grande ville fut bâtie sus septs monts.

Les rouais d'Rome 'taient d'eune originne Êtrustchienne et la tchultuthe dé Rome 'tait înfluencée par la cheinne d'l'Êtruthie et la cheinne d'la Grêce, tch'avait des colonnies dans l'pays. D'vièrs 500 d'vant l'Christ, les Romains fliantchîtent hors les rouais et r'nonchîtent l'înfluence Êtrustchienne – auprès, Rome 'tait eune républyique gouvèrnée par un sénat. Par la traîsième siècl'ye d'vant l'Christ, Rome 'tait l'preunmié pouver en Italie et en 146 d'vant l'Christ Rome contchéthit l'Afrique du Nord et la Grêce.

Lé gouvèrnément d'la républyique 'tait trîlyi par la dgèrre civile et à la fîn un système dé dictatuthe militaithe fut êtablyi par Jules César. Ses enn'mîns, êpeûthés par lé bit qu'i' s'n allait s'procliâmer l'nouvieau rouai, l'assâsinnîtent en 44 d'vant l'Christ. L'rouoyaume né fut d'aut' rêtablyi mais lé n'veu à Jules César, Aûdguste César, fut procliâmé Imperator ("l'chein tchi c'mande" en Latîn, et v'là tch'est l'originne du mot empéreu).

L'empéreu Constantîn fondit eune nouvelle capitale pouor l'empithe en 330Constantinopl'ye. Quand Constantîn atchilyit la Chrêtchienneté, l'êvêque dé Rome dévînt l'prêtre lé pus împortant d'l'êtat.

La fontaine dé Trévi fut finnie en 1762

Auprès la tchête du drein empéreu du Vouêt en 476, lé Pape prînt l'pouver à Rome. Duthant l'Mouoyen Âge, les Papes littaient auve des rouais et d's empéreurs. La R'naîssance têmouongnit l'haut dg'ieau d'la Papaûté – les ruinnes des templ'yes et les statues fûtent èrdêcouvèrtes et êtudiées.

Les Français êtablyîtent eune républyique en 1798 quand il' entrîtent Rome duthant les dgèrres révolutionnaithes. Mais l'Êtats du Pape fûtent rêtablyis en 1800. Napoléon donnit l'titre "Rouai d'Rome" à san fis, mais ch'tait raique honorifique.

L'Italie fut unnifiée souos l'Rouai du Pid-d'Mont et d'Savouaie en 1861 auve sa capitale à Turîn, mais Rome restait à contchéthi. En 1870 l'Rouoyaume d'Italie prînt Rome et la capitale fut r'muée d'Fliorence (où'est qu'oulle avait 'té d'pis 1865) en 1871.

Ditons[amendaer | modifier le wikicode]

  • Tout c'mîn mène à Rome

Viyiz étout[amendaer | modifier le wikicode]

Y a co' de quei à vei' ou à ouï' entou'
Rome
sus les Coumuns à Viquipédie