Unnion Soviétique

De Wikipedia
Aller à : navigation, rechercher
Ch't' articl'ye fut c'menchie en Jèrriais Jèrriais
L'êtchusson d'l'Union Soviétique

L' Unnion d'Républyiques Socialistes Soviétiques (en Russe: Союз Советских Социалистических Республик), racourchi Unnion Soviétique ou URSS, 'tait un êtat commeuniste en Ûrâsie entré 1922 et 1991. Entré 1945 jusqu'à sa tchête, l'Unnion Soviétique 'tait un supèrpiêssant êtat.

En théorie, l'Unnion Soviétique 'tait eune fédéthâtion d'républyiques êgales. En véthité, ch'tait eune dictatuthe.

Histouaithe[amendaer | modifier le wikicode]

Au mais d'Novembre 1917 les Commeunistes gaffîtent lé pouvé en Russie en procliâmant eune politique d'la paix dans la Preunmié Dgèrre Mondiale, d'la tèrre pouor les paysans, et du pouvé ès soviets – les conmités d'ouvrièrs.

S'lon la théorie soviétique, l's ouvrièrs et les paysans vot'taient pouor des députés ès soviets locaux, ches'-chîn vot'taient pouor des députés ès soviets régionnaux, et l'dgiâbl'ye à quat', jusqu'au Haut Soviet tchi forméthait l'gouvèrnément du pays. Chu système théoriquement démocratique fut rempliaichi en êffet par la nomm'thie d'touos les candidats par lé parti commeuniste.

En 1922, quat' républyiques soviétiques – la Républyique socialiste soviétique Ukraînienne, la Républyique socialiste soviétique Biélorusse, la Républyique socialiste fédéthative soviétique Russe et la Républyique socialiste fédéthative soviétique Transcaucasienne – lus accordîtent dé graie eune fédéthâtion s'lon un Accord d'Unnion sinné lé 29 d'Dézembre 1922. Ch't accord fut ratifié lé 30 dé Dézembre par un congrès d'soviets à Moscou tchi d'vînt la capitale. L'Unnion atchilyit eune constitution en 1924.

Léninne, tch'avait m'né la révolution, avait 'té sus l'cârré d'pis 1922 et i' mouothit en 1924. Ouaithe qué ch'fusse Stalinne tch'avait l'pouvé adminnistratif du parti dans ses mains, Léon Trotski 'tait l'chein préféthé par les membres du parti. Léninne laîssit un testament dans tchi qu'i' dgèrnit ses parchonnièrs entouor lé caractéthe dé Stalinne, mais ch'fut supprînmé. Pouor 1927 Trotski fut renv'yé hors pays (un agent Stalinniste l'assâsinnit en Mexique en 1940), et pouor 1929 Stalinne avait carré l's aut's vièrs Bolchéviques du pouvé.

À seule fîn d'stabilîser l'êcononmie auprès la dgèrre civile en Russie à la siette d'la révolution d'1917, Léninne avait r'întroduit un système du marchi. En 1928, Stalinne lanchit un progranme dé pliann'nie (lé plian à 5 ans) à seule fîn d'îndustrialîser l'pays. Chutte politique du "socialisme en un pays" rempliaichit l'avis d'Léninne et d'Trotski entouor la révolution întèrnâtionnale.

Duthant l's années 1930s, s'lon les c'mandes dé Stalinne nou blioutchait des millions d'gens, et chenna auve les vièrs Bolchéviques et parchonnièrs révolutionnaithes à Léninne. Y'en avait tchi fûtent tithés dêliément; y'en avait tchi fûtent renv'yés ès camps du GULAG. Tchiqu's'uns des grands projets îndustriels dé chu temps-là fûtent bâtis auve l'aîgue du travas forchis des prisonnièrs.

En 1939, l'Unnion Soviétique s'accordit auve l'Allémangne des Nazis un plian s'gret pouor chârer la Polongne, la Fînlande, l'Estonnie, la Lettonnie, la Lithuanie, la Roumanie. Quand les Nazis lanchîtent la S'gonde Dgèrre Mondiale, l'Unnion Soviétique en profitit en încorpouothant des tèrritouaithes. Mais l'22 d'Juîn 1941 l'Allémangne attatchit l'Unnion Soviétique.

L'Unnion Soviétique d'vînt un allié d'l'Empithe Britannique et ses parchonnièrs (et d's Êtats Unnis d'Améthique du mais d'Dézembre 1941). La victouaithe des alliés en 1945 laîssit la Rouoge Armée à otchuper des pays en Ûrope dans tchi qu'l'Unnion Soviétique înstâllit des régînmes commeunistes. V'là tch'est lé c'menchement d'la Fraide Dgèrre.

Stalinne mouothit en 1953. Nikita Khrouchtchov, tchi prînt les c'mandes du parti, dêcliâmit l'tchulte dé pèrsonnalité d'Stalinne et tchiqu'suns d'ses crînmes. Vl'à tch'înspithit des révoltes en Hongrie et Polongne, mais la politique Soviétique pus libéthale n'allouit pon d'itelles calenges, et les révoltes fûtent êglianmées.

L's avanches d'la scienche m'nîtent à la preunmié satellite lanchie d'la Tèrre Sputnik en 1957 et l'preunmié houmme lanchi en 1961.

La compétition militaithe et scientifique auve les Améthitchains duthant l's années 1960s affouaiblit l'êcononmie Soviétique. L's expéthînments d'Khrouchtchov lus adonnîtent pustôt d'sastreurs et i' fut rempliaichi par Léonid Bréjnev en 1964.

Bréjnev m'nait eune politique stabl'ye, mais les r'formes nécessaithes dans l'êcononmie et l'adminnistrâtion mantchaient. Pouor la mort d'Bréjnev en 1982 nou viyait l'bésouain d'èrforme mais nou n'viyait pon tchi r'formes graie. Youri Andropov tâchit, duthant san court mandat, d'rapporter d'l'ordre dans la sociêté en renforchant les règl'yes - mais viyant qu'l'êconomie înformelle et l'nièr marchi 'taient tout chein tchi faîthait marchi l'pays, v'là tchi n'avait pon grand êffet. En tout cas, Andropov mouothit en 1984. L'chein tchi fut chouaîsi auprès lî, Konstantîn Tchèrnenko, 'tait quâsiment sus l'pus quand il arrivit au pouvé, et il enduthit raîque treize mais.

En 1985 Mikhail Gorbatchov fut appouainté S'gréthaithe Génétha du parti.

Les Républyiques[amendaer | modifier le wikicode]

1956 à 1991, y'avait 15 républyiques fédéthales:

Les 15 Républyiques soviétiques 1956-1991
Républyiques soviétiques Êtats indépendants d'achteu
1. Républyique socialiste soviétique Arménienne Arménie
2. Républyique socialiste soviétique Azerbaidgiannaise Azerbaidgian
3. Républyique socialiste soviétique Biélorusse Bêlarus
4. Républyique socialiste soviétique Estonnienne Estonnie
5. Républyique socialiste soviétique Georgienne Georgie
6. Républyique socialiste soviétique Kazakhe Kazakhstan
7. Républyique socialiste soviétique Kirghize Kyrgyzstan
8. Républyique socialiste soviétique Lettonne Lettonnie
9. Républyique socialiste soviétique Lituannnienne Lithuanie
10. Républyique socialiste soviétique Moldave Moldova
11. Républyique socialiste fédéthative soviétique Russe Russie
12. Républyique socialiste soviétique Tajique Tajikistan
13. Républyique socialiste soviétique Turkmenne Turkmenistan
14. Républyique socialiste soviétique Ukraînienne Ukraîne
15. Républyique socialiste soviétique Uzbèque Uzbekistan


Viyiz étout

Commons-logo.svg

Y'a acouo d'tchi à vaie ou à ouï entouor
l'Unnion Soviétique
siez la C'meune à Ouitchimédia