Pièrre Paul Rubens

De Wikipedia
Ch't' articl'ye fut c'menchie en Jèrriais
Rubens, un portrait d'sé acanté sa bouonnefemme Isabella Brandt

Pièrre Paul (ou Pieter Pauwel, Petrus Paulus, et tout chenna) Rubens (28 d'Juîn 1577 - 30 dé Mai 1640) 'tait un peintre Baroque.

I' fut né à Siegen en Vouêtphalie d'eune fanmil'ye d'Anvèrs. La fanmil'ye y r'vîntent pouor 1589. D'1591 Rubens êtudiait la peindrie à Anvèrs et en 1600 i' s'en fut en Italie et d'vînt peintre à la cour du Duc dé Mantoue, Vincenzo Gonzaga. En 1603 il accompangnit eune vîsite dipliomatique à Madrid. Épis i' viaigeait en Italie jusqu'à la mort d'sa méthe en 1608 quand i' r'allit à Anvèrs et d'vînt peintre à la cour des Gouvèrneurs des Pays Bas.

I' s'mathyit auve Isabella Brandt en 1609 et lanchit chein qu'nou peut app'ler eune mannifactuthe dé peindrie pouor satisfaithe les c'mandes pouor des portraits. Viyant qu'il avait êtudié la manniéthe Italienne, ses portraits 'taient populaithes pouor couvri les muthâles et pliafonds d'palais et d'églyises - il empliyait d's assistants pouor ag'ver ches portraits s'lon ses plians et brouoillons.

D'1623 Rubens atchilyait des missions dipliomatiques au nom des Gouvèrneurs des Pays Bas. En Angliétèrre 1629-1630 i' fut nommé C'valyi par l'Rouai Charles I d'Angliétèrre.

Sa preunmié femme mouothit en 1626 et i' s'èrmathyit auve Hélène Fourment en 1630.

I' mouothit à Anvèrs en 1640.

Y a co' de quei à vei' ou à ouï' entou'
Rubens
sus les Coumuns à Viquipédie