Pablo Picasso

De Wikipedia
Aller à : navigation, rechercher
Ch't' articl'ye fut c'menchie en Jèrriais Jèrriais


Pablo Ruiz y Picasso (Malaga, 1881-1973) 'tait un artiste - iun des pus fanmeurs peintres du 20e siècl'ye à la tête d'l'art modèrne pouor bein d's années.

San talent fut r'connu quand i' 'tait acouo janne à Barcélonne. Au c'menchement du 20e siècl'ye i' s'en fut à Paris où'est qu'i' travaillait dans eune manniéthe pustôt Post-Împressionniste. Sa Bliue Période, des portraits d'la vie des pouôrres gens, fut sieue par eune Rose Période, d's acrobates, des dans'rêsses et des harlétchîns. En 1907 i' fut înfluencé par eune exhibition d'art Afritchain et des mêlanges dé pèrsonnes mastchies, susfaches bûchies et d'sabilyies cliassiques appathûtent dans san travas. Auve Georges Braque, il înventît l'Cubisme (Tchubisme) et pouor 1912 lus dêbouêqu'thie d'susfaches avînt au collage.

Eune stchulptuthe à Stockholm
Signatur Pablo Picasso

Mais au c'menchement d'la Preunmié Dgèrre Mondiale, Picasso r'nonchit la racachie d'artistes tch'avaient sieu l's avis Tchubistes et r'allit au Cliassicisme et la crèyonn'nie. Des portraits d'anatonmie monumentale fûtent sieus par des portraits dans tchi qu'les corps 'taient quâsiment pêtris, changis, squouîzis et teurts.

La Dgèrre Civile Espangnole înspithit san portrait monumenta Guernica tchi fut fait pouor eune grande exhibition. San travas 'tait pustôt nièr jusqu'à la fîn d'la S'gonde Dgèrre Mondiale quand i' pâssit l'Otchupâtion à Paris. Mais auprès la dgèrre i' r'muit au Sud d'la France où'est qu'il expéthînmentait auve d'la pot'tie, la peindrie d'muthâles, la stchulptuthe et l'èrînvention d'portraits ès grands maît's.

Commons-logo.svg

Y'a acouo d'tchi à vaie ou à ouï entouor
Pablo Picasso
siez la C'meune à Ouitchimédia