Vrai

De Wikipedia
Ch't' articl'ye fut c'menchie en Jèrriais
d'la cliouque (Ulva lactuca)

vrai (Guernésiais : vré, Cotentinais : vrai) est eune pliante d'la fanmil'ye des algues tchi craît dans l'ieau, sustout dans la . Y'a un tas d'difféthentes manniéthes dé vrai.

Temps pâssé, les fèrmièrs en Jèrri soulaient faithe sèrvi du vrai pouor amender lus tèrres. Lé miyeu vrai est considéthé être lé collet, mais selon les tèrres et selon l's années i' peut êt' trop fraid pouor la récolte d'patates. I' s'y'en trouve hardi pus dans l'Vouêt, dé ch'tî-chîn, tandi qu lé vrai d'l'Êst est pûtôt du vrai taillais ou pliat vrai, ou du cracot, tch'est à peine si riche mais conveint mus selon les tèrres, car i' n'est pon si fraid. Y'a d'la cliaque (ou cliouque) étout, qué nou trouve dans les Grèves dé la Ville, et du tangon, du vrégîn, du lachet et d'la plîse (ou d'l' hèrbi ou du courtîn) - parmi l'vrai considéthé inférieur. Et y'a du tout failli vrai, comme du crachet (pouor brûler dans l'âtre aut'fais), du fieillu, d'la chérise et d'l' ivraie.