Autriche-Hongrie

De Wikipedia
Aller à : navigation, rechercher
Ch't' articl'ye fut c'menchie en Jèrriais Jèrriais
Les frontchiéthes d'l'Autriche-Hongrie d'vièrs 1914

L' Autriche-Hongrie 'tait un empithe ou doubl'ye-êtat en Ûrope tch'existait d'1867 à 1918

Histouaithe[amendaer | modifier le wikicode]

La dŷnnastie des Habsbourgs avait règné sus des tèrritouaithes en Ûrope du Mitan pouor des siècl'yes. Au c'menchement du 19e siècl'ye lé trône du Saint Empithe Romain 'tait acouo auve ieux, mais les contchêtes dé Napoléon Bonaparte avaient affouaiblyi l'vièr empithe. Quand Napoléon procliâmit l'Empithe Français en 1804, l'Empéreu Françouais II du Saint Empithe Romain décidit d'graie un êtat dans ses tèrres à li en Autriche. L'Empithe d'Autriche fut fondé don à seule fîn d'êt' eune fondâtion pus seûse pouor la dŷnnastie des Habsbourgs endrait la m'niche des Français et lus tèrritouaithes contchéthis en Allemangne. Lé 11 d'Août 1804, Françouais II d'vînt Françouais I d'Autriche. Lé Saint Empithe Romain fut finnalement dêbouêtchi l'6 d'Août 1806.

L'Empéreu d'Autriche continnuait coumme d'amors d'gouvèrner l'Hongrie et les tèrritouaithes dé san rouoyaume coumme lé Rouai d'Hongrie, mais l's Hongriens d'mandaient des r'formes politiques. I' r'voltîtent en 1848, eune révolution tchi fut mînse bas. Les înstitutions d'l'êtat Hongrien fûtent supprînmés, mais auprès les dêfaites d'la dgèrre contre les Prussiens en 1866 l'Empéreu n'pouvait d'aut' s'asseûther au pouvé sans l'souôtchein d'la noblièche Hongrienne. L' Ausgleich ("compromîns") d'1867 changit la monnarchie en un doubl'ye-êtat: y'avait un chef d'êtat tchi 'tait l'empéreu en Autriche et ses tèrritouaithes et l'rouai en Hongrie et ses tèrritouaithes; y'avait un gouvèrnément tchi sé d'mentait d'la d'fense et des r'lâtions êtrangiéthes et l'unnion d's împôts. Pouor lé restant, châque maîntchi d'l'empithe avait san preunmié minnistre, san parlément, et san budget.

L's empéreurs[amendaer | modifier le wikicode]

Les nâtions d'l'empithe[amendaer | modifier le wikicode]

Autriche-Hongrie

Ouaithe qu'les Allemands d'l'Autriche et les Hongriens d'Hongrie 'taient en chèrge d'lus parties d'l'empithe, ches nâtions-là n'taient pon même eune mâjorité dans lus maîntchi à ieux. Les Slaves 'taient des minnorités împortantes, et y'avait des d'mandes dé transformer l'doubl'ye-êtat en tripl'ye-êtat (Allemands-Hongriens-Slaves).

Lé hèrtchîn siez les Slaves du Sud êmoûtchit la Preunmié Dgèrre Mondiale, et pouor la fîn d'la dgèrre les supporteurs d'l'îndépendance avaient gângni l'souôtchein d's Alliés. La dêfaite d'l'Autriche-Hongrie dans la dgèrre libéthit les Polonnais en Polongne, les Tchèques, les Slovaques et les Ruthéniens en Tchécoslovaquie, les Slovéniens, les Croates, les Bosniens, les Sèrbes dans l'Rouoyaume des Sèrbes, Croates et Slovéniens, l's Italiens dans lus tèrritouaithes tchi r'jouaignîtent l'Italie et les Roumains d'la Transylvannie tchi r'jouaignit la Roumanie. Eune républyique d'Autriche et l'rouoyaume d'Hongrie 'taient raîque des êqu'sîns du vièr empithe.

Les nâtions
d'l'Autriche-Hongrie
Allemands 24%
Hongriens 20%
Tchèques 13%
Polonnais 10%
Ruthéniens 8%
Roumains 6%
Croates 5%
Slovaques 4%
Sèrbes 4%
Slovéniens 3%
Italiens 3%
Commons-logo.svg

Y'a acouo d'tchi à vaie ou à ouï entouor
l'Autriche-Hongrie
siez la C'meune à Ouitchimédia