George F. Le Feuvre

Ch't' articl'ye fut c'menchie en Jèrriais

La sépultuthe à George d'la Forge

George F. Le Feuvre (George d'la Forge) (29 d'Septembre 1891 – 27 d'Octobre 1984 'tait un auteu Jèrriais.

I' fut né à La Forge, Millais, Saint Ouën. En 1901, sa fanmil'ye viagîtent à La Côte, et George restit en Jèrri. Auprès la Preunmié Dgèrre Mondiale, lé janne veuvyi r'joingnit sa fanmil'ye au Cannada mais en 1922 i' fut ès Êtats Unnis d'Améthique pouor "chèrchi sa forteune". I' s'èrtithit comme exétchutif en 1946, êtant dév'nu citouoyen Améthitchain. Duthant chu temps-là, i' continnuait à êcrithe, souos l'nom George d'la Forge, bein des choses entouor l'histouaithe, la langue et la vie Jèrriaise, et pis i' c'menchit à pâsser san temps en Texas et en Jèrri au Mênage ès Feuvres à St. Ouën. D'èrtou en Jèrri i' fut l'preunmié ségrétaithe d'L'Assembliée d'Jèrriais en 1951.

Il êcrivit pus d'mille Lettres du Bouanhomme George pouor les gâzettes, dé tchi tchiqu's'eunes fûtent èrpubliées en deux livres, Jèrri Jadis (1973) et Histouaithes et Gens d'Jèrri (1976), et des articl'yes pouor Lé Bulletîn d'Quart d'An d'l'Assembliée d'Jèrriais. Ses êcrituthes sont pustôt nostalgiques pouor lé Jèrri d'sa jannèche, mais i' faîthait des commentaithes entouor la politique întèrnâtionnale et les pays qu'i' vîsitait. En 1974, i' r'chut lé Prix Littéraire du Cotentin, et en 1981, les Êtats dé Jèrri lî fitent eune présentâtion pouor ses contributions à l'Île, et deux ans et d'mie pus tard La Société Jersiaise lé nommit Membre d'Honneu.

I' mouothit à San Antonio, Texas.