Jacques l'Êbieilleux

De Wikipedia
Aller à : navigation, rechercher
Ch't' articl'ye fut c'menchie en Jèrriais Jèrriais


Jacques l'Êbieilleux (audgo Jacques l'Êbieilleux; en Angliais: Jack the Ripper) est l'mênom bailli à un meurtriyi înconnu tchi tuit au mains chîn femmes à Londres en 1888. Chu mênom vînt d'eune lettre adréchie à la Central News Agency souô-dîthant d'la pleunme du meurtriyi. Viyant qu'lé meurtriyi n'fut janmais dêcouvèrt, l'mystéthe a êtibotchi du folklore et des théories d'compliot avaû l's années. Lé dêv'loppement d'gâzettes populaithes dé sensâtion et d'scandale et la c'meunicâtion l'travèrs du monde tchultivit la r'nommée d'chu meurtriyi.

Les victînmes 'taient des guénipes tchi fûtent assâsinnées pustôt dans les choses publyiques dans l'quartchi d'Whitechapel dans l'But d'l'Êst dé Londres. I' fûtent bigorgies épis nou mutilyit les corps. Nou-s'a proposé qu'lé meurtriyi éthait deu êt' docteu ou ofûche bouochi d'mêtchi viyant la manniéthe qu'des organnes fûtent copées du corps.

Ouaithe qu'des guénipes et souiches fûssent attatchies rédguliéthement 'chîn et là, ches chîn victînmes sont les cheinnes attribuées en génétha à Jacques l'Êbieilleux:

  1. Mary Ann Nichols (née Mary Ann Walker, mênommée "Polly"), née l'26 d'Août 1845; ou fut tuée Vendrédi, 31 d'Août 1888. San corps fut dêcouvèrt d'vièrs 3h40 du matîn dans l'aithe endrait l'hus d'eune êtabl'ye dans Buck's Row.
  2. Annie Chapman (née Eliza Ann Smith, mênommée "Dark Annie"), née Septembre 1841; ou fut tuée Sanm'di, 8 Septembre 1888. San corps fut dêcouvèrt d'vièrs 6h00 du matîn dans l'aithe pas liain d'la porte du bel dé 29 Hanbury Street, Spitalfields.
  3. Elizabeth Stride (née Elisabeth Gustafsdotter, mênommée "Long Liz"), née en Suède 27 Novembre 1843; ou fut tuée Dînmanche, 30 Septembre 1888. San corps fut dêcouvèrt d'vièrs eune heuthe du matîn, dans l'aithe à Dutfield's Yard, dans la rue Berner Street à Whitechapel.
  4. Catherine Eddowes (tchi faîthait sèrvi étout les noms "Kate Conway" et "Mary Ann Kelly," s'lon les noms d'fanmil'ye d'ses parchonnièrs Thomas Conway et John Kelly) née 14 Avri 1842 ; ou fut tuée Dînmanche, 30 Septembre 1888, l'même jour qu'la victînme dé d'vant, Elizabeth Stride. San corps fut dêcouvèrt à Mitre Square, dans la Cité d'Londres.
  5. Mary Jane Kelly (tchi s'app'lait "Marie Jeanette Kelly" ayant vîsité Paris, mênommée "Ginger"), s'posêment née dans les 1863 en Irlande, ofûche à Limerick; ou fut tuée Vendrédi, 9 Novembre 1888. San corps fut dêcouvèrt à 10h45 du matîn au liet dans la chambre où'est qu'ou d'meuthait à 13 Miller's Court, d'un bord dé Dorset Street, Spitalfields.
Commons-logo.svg

Y'a acouo d'tchi à vaie ou à ouï entouor
Jacques l'Êbieilleux
siez la C'meune à Ouitchimédia