Jean Le Capelain

Ch't' articl'ye fut c'menchie en Jèrriais

Jean Le Capelain fit étout l'design d'la cliôtuhe d'l'églyise dé Saint Hélyi.

Jean Le Capelain (5 Octobre 1812 – 17 Octobre 1848) 'tait un peintre Jèrriais. i' fut né à Saint Hélyi en 1812,lé fis d'Samuel Le Capelain et Lîzabé Anne Pinkney.

Sa manniéthe dé peindrie 'tait romantique et nou l'compathit à J.M.W. Turner, viyant qu'il aimait l's êffets d'lueu et d'bliâse. Ses portraits 'taient pustôt d'Jèrri, mais i' viageait étout et fit des portraits en Êcosse et en Galles.

I' travaillait dans un appartément au haut dé l'Hôtel Calvados sus la carre d'la Rue Trousse Côtillon et la Rue des Trais Pigeons (où'est qu'lé but du Bâtisse des Êtats est achteu).

Quand la Reine Victoria vîsitit Jèrri en 1846, l's Êtats d'Jèrri c'mandîtent eune collection d'veues d'Jèrri. Le Capelain fit dgiêx-neuf veues d'Jèrri et siêx portraits d'la vîsite même. Ches aquarelles fûtent présentées à la Reine. Nou-s'en fit étout des lithographes des portraits et les publyîtent dans un livre: The Queen's Visit to Jersey, drawn by J. Le Capelain, published by Philip Falle, Jersey, 1847, dé tchi Le Capelain couleuthit à la main tchiques copies.

Ayant atchilyi ches portraits, la Reine quémandit eune séthie d'portraits d'Ouitte, mais tandi qu'i' 'tait à travailli sus, Le Capelain fut afflyigi d'conseunmtion. I' mouothit l'17 d'Octobre 1848 dans la Rue des Trais Pigeons à Saint Hélyi.

Eune souscription (dé tchi Henri Luce Manuel 'tait s'grétaithe) tcheûtit £210 pouor eune gal'lie. I' n'y'avait pon assez d'sou pouor bâti eune gal'lie et don nou-s'acatit eune collection d'portraits tchi sont exhibés dans la Salle Pârouaissiale dé Saint Hélyi.