Ouînchêtre

De Wikipedia
Aller à : navigation, rechercher
Ch't' articl'ye fut c'menchie en Jèrriais Jèrriais
La cathédrale d'Ouînchêtre

Ouînchêtre (audgo Ouînchêtre; en Angliais: Winchester) est eune ville en Angliétèrre. La ville est la capitale du comté dé Hantésire et, auve les contrées à l'entou, oulle est eune cité.

Histouaithe[amendaer | modifier le wikicode]

Des câtchieaux d'l'Âge dé Fé fûtent bâtis du bord du Vouêt du mitan d'la ville sus les bords d'la riviéthe Itchen et tchi fûtent rempliaichis par eune ville Romaine d'vièrs 70 auprès l'Christ. Chutte ville avait nom Venta Belgarum (marchi ès Belgae). Les Belgae 'taient un tribu Celtique du pays et Venta Belgarum d'vînt lus capitale. Pouor l'4e siècl'ye la ville fut enmuthaillie, mais nou sembl'ye aver r'nonchi la ville pouor l'5e siècl'ye.

Les Celtes sembl'yent aver app'ler la ville Caergwinntgui tchi veurt dithe blianc châté. Les Saxons éthaient r'prîns chu nom-là coumme Wintanceastre à la siette d'lus contchête du pays en 519.

La vielle cathédrale fut bâtie en 648 (ou d'vînt eune cathédrale en 660). Saint Swithîn fut entèrré là en 862.

L'Rouai Caedwalla d'Ouessesse fit Wintanceastre sa capitale auprès 686, mais Ouînchêtre d'vînt définnitivement la capitale du rouoyaume d'827. Pus tard Ouînchêtre d'vînt la capitale du rouoyaume d'Angliétèrre - mais auprès la Contchête Nouormande la capitale fut fitchie pouor du bouôn à Londres.

La cathédrale d'Ouînchêtre d'achteu rempliaichit la vielle cathédrale en 1079. La cathédrale a 'té agrandie avaû l's années et nou dit qu'oulle est la deuxième pus longue en Ûrope. La sépultuthe dé Saint Swithîn attriotchait hardi d'pélérîns jusqu'à la R'formâtion.

Mais eune grande partie d'la ville brûlit en 1141 et v'là tchi trînmoussit la tchête d'la ville en împortance.

Êducâtion[amendaer | modifier le wikicode]

Lé Collège d'Ouînchêtre (Winchester College), ieune des pus fanmeuses êcoles Angliaîches, fut fondé en 1382 par l'Êvêque dé Ouînchêtre (tchi fondit l'Neu Collège à Oxford étout) - ch'est l'êcole tch'a la pus longue histouaithe en Angliétèrre.

En 2005 l'Unnivèrsité d'Ouînchêtre èrchut sa charte d'unnivèrsité. Oulle avait 'té fondée coumme King Alfred's College en 1840 pouor la duithie d'ensîngnants.

Êvêtché[amendaer | modifier le wikicode]

D'pis la R'formâtion, l'églyise êtablyi ès Îles d'la Manche est souos l'autorité d'l'Êvêque dé Ouînchêtre, ayant 'té transféthée d'la juridiction d'l'Êvêque dé Coutanches.

Commons-logo.svg

Y'a acouo d'tchi à vaie ou à ouï entouor
Ouînchêtre
siez la C'meune à Ouitchimédia