Prague
Ch't' articl'ye fut c'menchie en Jèrriais
|
Prague (en Tchèque: Praha) est eune ville tch'est la capitale d'la Républyique Tchèque.
Y'a dans les 1.2m d'pèrsonnes tch'y d'meuthent, et d'pis la tchête du Ridgieau d'Fé la ville a attriotchi des fliotchets d'touristes et est achteu ieune des villes les pus vîsitées en Ûrope. La ville né fut pon bombardée duthant la S'gonde Dgèrre Mondiale et les vièrs bâtisses fûtent don êpaîngnis.
Parmi l's attractions d'la ville sont lé Châté d'Prague auve la Cathédrale dé Saint Vi, lé Pont Charles, la Vielle Ville, lé chînm'tchiéthe ès Juis, la Pièche Vaclav.
Histouaithe
[amendaer | modifier le wikicode]Lé châté d'Prague fut fondé d'vièrs la fîn du 9e siècl'ye. Lé châté d'Vyšehrad bâti dé l'aut' bord d'la riviéthe Vltava d'vînt l'preunmié châté des rouais d'Bohême.
S'lon la légende, ch'fut la prîncêsse Libuše tchi chouaîsit l'fèrmyi Přemysl pouor san bouanhoumme et fondit la dŷnnastie Tchèque. Chutte prîncêsse légendaithe préviyit "eune ville dé tchi la glouaithe touch'cha l's êtailes".
En 1257, lé P'tit Bord (en Tchèque Malá Strana) fut fondé souos l'Châté d'Prague dé l'aut' bord d'la riviéthe dé la Vielle Ville.