René Girard
René Girard naquit le 25 de déchemb'e de 1926 en Avignon en Provenche et rendit l'âme le 4 de novemb'e de 2015 à Paris. I' fut un anthropologue, professeu' de lettres françaises en France et en Amérique, essayiste et memb'e des Immorté's de l'Académie Française. René Girard disit souventefeis de li-même qu'il était l'houme d'eune seule intuition, la chelle qu'i' développit dans sen premier liv'e (Menterie roumantique et Vérité roumanêque, publié en 1961) : le désir mimétique. Et, de fait, ch'est ch'te théorie qui le condûsit à diverses grandes découvertes pou' l'anthropologie et la counaissanche des rapport ent'es les houmes et, su' le plan persouné', à se converti' oû chrîtianême (selon li, la r'ligion chrétienne fut la seule à nous dire la vérité su' la nature vaniteuse de l'houme et su' la féchon d'en chevi' pa' le Christ). En cha, René Girard fit partie de ches persounes qui, coume itout Claude Tresmontant, apportît'ent eun éclairgiment neuf et eune comprenaison nouvelle su' la r'ligion.