X-raiethie

De Wikipedia
Ch't' articl'ye fut c'menchie en Jèrriais
L'întèrprétâtion d'l'x-raiethie est împortante pouor dgiag'noser les maux

L'x-raiethie (audgo x-raiethie) est la r'gard'die d'dans ou l'travèrs dé tchi en faîthant sèrvi des rayons X, ou au jour d'aniet, d'aut's manniéthes dé rayons ou d'louêmes.

L'x-raiethie est faite sèrvi dans la méd'cinne à seule fîn d'vaie l'anatonmie, mais y'a étout d'aut's usages, par exempl'ye l'x-raiethie d'seûth'té ès aéroports et d'aut's bords.

Lé 22 d'Dézembre 1895 Wilhelm Röntgen fit l'preunmié radiographe (photographe à rayons X) d'la main à sa bouonnefemme Anna Bertha. Röntgen èrchut l'preunmié Prix Nobel pouor la phŷsique en 1901 pouor sa dêcouvèrte.

Les docteurs réalîsîtent bein quédaine les beinfaits d'pouver vaie la stchelette et les difféthentes ombres embliâsées d'la chai et d's organnes d'l'anatonmie. S'nou peut x-rayer l's os bûchis, les teunmeurs et tout chenna, nou-s'arrive pus aîsiment à les dgiag'noser. V'là tch'est la scienche d'la radiologie. Duthant la Preunmié Dgèrre Mondiale Marie Curie encouothagit la radiologie pouor souongni les soudards bliessés en griyant des ouadgîns radiologiques êtchipés atout des machinnes à radgium.

D'pis l's expéthînments à Wilhelm Röntgen, nou-s'a dêv'loppé des nouvelles manniéthes dé vaie lé d'dans d'l'anatonmie. L'ultrason fait sèrvi des louêmes dé son à haute frétchenche, tandi qu'l'èrsonn'nie mangnétique fait sèrvi des louêmes dé radio tchi pâssent par des cliôsées mangnétiques. Auve l'aîgue dé compiuteurs, l'x-raiethie peut achteu faithe des portraits dé tranches lé travèrs du corps - ch'est chein qu'nou-s'appelle la tomographie à compiuteu tchi fut dêv'loppée par Messire Godfrey Hounsfield.

Y a co' de quei à vei' ou à ouï' entou'
l'x-raiethie
sus les Coumuns à Viquipédie