Bangnérêsse
Ch't' articl'ye fut c'menchie en Jèrriais
|
Eune bangnérêsse (
bangnérêsse) est eune manniéthe dé mathe construite à seule fîn qu'les gens piêssent lus bangni d'dans ou bein pratitchi l'alanchie ou la nagegie.
Sans doute dans les touos vièrs temps les pus grands bains bâtis dans l'Êst du Mitan et par les Romains 'taient ofûche des bangnérêsses. Mais ch'tait pustôt au 19e siècl'ye qu'les preunmié bangnérêsses fûtent bâtis quand l'monde quémenchaient à penser à la nag'gie coumme sport ou coumme laîsi.
Quand l'tourisme ès grèves dévînt populaithe au 19e siècl'ye, y'avait des grèves où'est qu'i' n'tait dgéthe conv'nabl'ye dé nagi, viyant les rotchièrs ou les grandes mathées. En bâtissant des muthâles, nou r'ténait d'la mé assez pouor y nagi même auprès l'èrtithant. La Mathe Victoria dans la Baie d'Saint Aubîn et la bangnérêsse du Hâvre des Pas sont d'chutte manniéthe.
Des bangnérêsses couvèrtes 'taient bâties étout, et la nag'gie coumme sport 'tait encouothagie. Ès Gammes Olŷmpiques, les preunmié compétitions 'taient coursées dans des mathes et des riviéthes, mais avaû l's années eune bangnérêsse standarde fut dêv'loppée: 50 m dé long par 25 m dé laize.