Tourisme

Ch't' articl'ye fut c'menchie en Jèrriais

Coumme ichîn à Arles, nou vîsite les ruinnes du temps pâssé en d'meuthant dans un hôtel

Lé tourisme est la faîs'sie d'viages ou d'touônnées pouor lé laîsi ou l'fanne. Ch'est pôssibl'ye dé vîsiter un bord pouor lé tourisme et pouor eune aut' raîson étout: par exempl'ye, lé tourisme dé santé quand nou vîsite ofûche un spa ou des caudes fontaines ou eune aut' pliaiche èrnommée pouor s'n êffet sus la santé.

Histouaithe

Nou dithait qu'les preunmié viages touristiques éthaient 'té des pèlerinnages quand les gens allaient vîsiter un lieu saint ou des lieux saints, pas sèl'ment à seule fîn d'y pratitchi lus r'ligion mais pouor vaie un pays difféthent ou eune ville difféthente et ses attractions.

Y'avaient des gens tchi viageaient pustôt pouor vaie les mèrveilleurs templ'yes, sanctuaithes, statues des dgieux ou des saints, ou cathédrales.