Cité
Ch't' articl'ye fut c'menchie en Jèrriais
|
.JPG)
Eune cité est ofûche eune grande ville, sustout eune capitale d'un pays ou d'eune région, ou eune ville tch'a 'té appouaintée au preunmié rang, par exempl'ye, atout eune charte rouoyale.
Rouoyaume Unni
[amendaer | modifier le wikicode]Au Rouoyaume Unni y'a des villes tch'ont 'té des cités d'pis les touos vièrs temps. L's aut's cités ont r'chu des chartes avaû les siècl'yes. Y'en a tchi craient qu'eune cité au Rouoyaume Unni dait aver eune cathédrale, mais nou-fait, car y'a tchiques cités tchi n'ont pon d'cathédrale, et des villes tch'ont eune cathédrale. Y'a au jour d'aniet 66 cités officiellement r'connues au Rouoyaume Unni, mais nou-s'appelle autcheune grande ville dé couôteunme eune cité.
Lé monarque peut nommer des nouvelles cités à seule fîn d'mèrtchi des dates spéciales. Les dreines cités fûtent appouaintées en 1969 (Souansé; pouor l'assèrmentâtion du Prînce dé Galles), 1977 (Dèrby; pouor lé Jubilé d'la Reine), 1992 (Sundèrland; pouor lé quarantchième du règne), 1994 (Saint Dâvi, Armagh), 2000 (Brighton & Hove, Wolverhampton, Învèrness; pouor lé Millénaithe), 2002 (Preston, Newport, Stirling, Lisburn, Newry; pouor lé Jubilé d'la Reine).
Irlande
[amendaer | modifier le wikicode]Dans la Républyique d'Irlande y'a 6 cités tchi fûtent appouaintées souos l'Rouoyaume d'Irlande d'vant l'unnion auve la Grande Brétangne. La Républyique n'a pon d'mouoyen d'appouainter d'nouvelles cités.
Êtats Unnis d'Améthique
[amendaer | modifier le wikicode]Dans la mâjorité d's êtats ès Êtats Unnis d'Améthique, la difféthence entre eune cité et eune ville est qu'eune cité a un maire.
Suède
[amendaer | modifier le wikicode]Jusqu'en 1971, la Suède avait 134 cités (stad) appouaintées par eune charte rouoyale. En 1971 les cités et les villes fûtent rempliaichies par des c'meunes.