Francis Henry Jeune

De Wikipedia
Sauter à la navigation Sauter à la recherche
Ch't' articl'ye fut c'menchie en Jèrriais Jèrriais
Francis Henry Jeune

Francis Henry Jeune, Baron St Hélier (17 Mar 18439 Avri 1905) 'tait un juge en Angliétèrre.

I' fut né au Douoyenné d'Saint Hélyi en 1843, l'fis d'Françouais Jeune, lé Douoyen d'Jèrri (et pus tard Êvêque dé Péterbourg) et Margaret Dyne Symons. I'fut êdutchi à Exmue épis à Harrow (1856-1861), et gângnit eune bourse pouor l'Unnivèrsité d'Oxford, où'est qu'i' d'vînt Président d'l'Unnion en 1864.

I' d'vînt un avocat Angliais l'17 d'Novembre 1868. En 1869 i' s'en fut en Australie à seule fîn d'èrchèrchi la cliâme dé Tichborne, eune affaithe fanmeuse. I' r'présentit l'appel dé Louis Riel d'vant l'Conseil Privé d'Sa Majesté.

En 1874 i' d'vînt un parchonnyi du Collège d'Hèrtford à Oxford.

En 1880 i' s'mînt sus les rangs pouor lé parlément du Rouoyaume Unni (coumme Consèrvateu) mais pèrdit l'êlection à Cochêtre par raîque deux vouaix. En 1890 i' r'fusit l'poste d'Avocat-Génétha d'la Reine, et en 1891 d'vînt un juge d'la Cour des testaments, des divorces et d'l'Amithaûté. I' fut appouainté C'valyi en 1891 et en 1892 d'vînt Président d'la Cour des testaments, des divorces et d'l'Amithaûté, un Consilyi Privé d'Sa Majesté, et Assesseux-Génétha Militaithe.

I' s'èrtithit pouor des raîsons d'santé au mais d'Janvyi 1905 et fut êl'vé au rang d'Baron. I' prînt l'titre dé Lord St Hélier (et il însistit sus l'accent) mais i' mouothit l'9 d'Avri 1905 siez li dans la Rue Harley à Londres. San fis avait mouothi en 1904 en Înde et don l'titre dispathut, sénon qu'Lady St Hélier (Susan Mary Elizabeth Stewart Mackenzie, dêdgèrpie d'John Constantine Stanley, tchi s'mathyit auve Francis Jeune en 1881) 'tait membre du Conseil du Comté d'Londres 1910-1927. Ou travaillyit pouor l'èrlouogement des pouôrres gens et la nouvelle contrée d'Londres bâtie 1928-1936 fut bâptîsie St. Helier pouor lyi.