Françouais Jeune

De Wikipedia
Sauter à la navigation Sauter à la recherche
Ch't' articl'ye fut c'menchie en Jèrriais Jèrriais
Françouais Jeune

Françouais Jeune (22 Mai 180621 Août 1868) 'tait Douoyen d'Jèrri, Président du Collège dé Pembroke à Oxford, et Êvêque dé Péterbourg.

I' fut né à Saint Aubîn en 1806, lé fis d'Françouais Jeune, fis Françouais, monnyi d'Saint Aubîn, et Lîzabé Le Capelain. I' fut êdutchi siez L'Maistre à Saint Aubîn, au Collège Saint Sèrvan à Rennes et à l'Unnivèrsité d'Saumur. I' s'en fut à l'Unnivèrsité d'Oxford et entrit l'Collège dé Pembroke en 1822. I' d'vînt un parchonnyi du Collège en 1830 et r'chut san doctorat en 1834.

En 1832, i' s'en fut au Cannada coumme s'grétaithe du Gouvèrneux-Génétha, Messire John Colburn. D'èrtou en Angliétèrre en 1834 i' d'vînt Directeu d'l'êcole King Edward's Grammar School à Birmingham.

En 1836 i' s'mathyit auve Margaret Dyne Symons, et en 1838 i' fut appouainté Douoyen d'Jèrri et Recteu d'Saint Hélyi. I' proposit qu'la Pâraisse vendisse lé vièr Douoyenné en Ville à seule fîn d'bâti un neu du bord d'la Rue du Va. I' tcheûtit des sou pouor bâti l'églyise dé Saint Matchi (1843) et l'églyise dé Saint Mar à côté du Douoyenné (1844).

Les Rôsièrs 'taient contre l'Douoyen pouor des raîsons politiques. Quand un assâsîn espéthant attatchit la Reine Victoria en 1840, lé texte des Actions d'Grâce n'arrivit pon en Jèrri en temps pouor qu'lé Douoyen pûsse lé faithe sèrvi l'Dînmanche tchi siévit. Nou l'crititchit dans les gâzettes pouor aver ieu d'la sŷmpathie auve l'assâsîn mantchi. I' poussit l'éditeu en cour, mais l'procès faillit.

En 1843 nou lî'offrit l'Êvêtchie d'Nouvieau Brunswick mais i' l'èrfusit, et nou dithait qu'l'Archêvêque dé Cantorbéry 'tait d'avis d'graie eune êvêtchie d's Îles d'la Manche et d'nommer l'Douoyen Jeune coumme san preunmié êvêque – mais rein d'ité n's'adonnit.

En 1844, tout coumme, i' d'vînt l'Président du Collège dé Pembroke à Oxford. I' lanchit des r'formes du Collège. Mais i' n'oublyit pon Jèrri et prînt part dans la consultâtion des plians pouor lé Collège Victoria.

En 1850 lé gouvèrnément du Rouoyaume Unni proposit d'èrformer l's unnivèrsités du rouoyaume. L'Révérend Jeune fut appouainté iun des sept Commissaithes tchi modèrnîsîtent les constitutions des unnivèrsités. I' 'tat l'Député Chancélyi d'l'Unnivèrsité d'Oxford 1858-1862.

En 1856, lé Preunmié Minnistre, l'Lord Palmerston, avait proposé d'l'appouainter coumme Êvêque dé Glochêtre. Lé brit d'l'appouaintement fut publié dans la gâzette The Times et quand la Reine Victoria liut la nouvelle pouor la preunmié fais dans la gâzette ou r'fusit d'approuver la nonminnâtion. En 1861 l'Lord Palmerston r'êprouvit pouor l'êvêtchie d'Durham, mais acouo eune fais la Reine èrfusit. À la fîn au mais d'Janvyi 1864 l'Révérend Jeune fut appouainté Douoyen d'Nicolle et pus tard ch't' année-là l' Êvêque dé Péterbourg.

I' mouothit à Whitby en 1868.

San fis Francis Henry Jeune d'vînt l'Baron St Hélier.