John Everett Millais

De Wikipedia
Aller à : navigation, rechercher
Ch't' articl'ye fut c'menchie en Jèrriais Jèrriais
Eune statue d'Millais à la Gall'lie Tate, Londres

Messire John Everett Millais (1829-1896), Baronnet, 'tait un peintre. I' d'vînt Président d'l'Académie Rouoyale à Londres.

San péthe, John William Millais, d'La Couaie, Saint Hélyi, allit à Hantonne. Lé p'tit John fut né là l'8 d'Juîn 1829. Quand il avait 4 ans, la fanmil'ye èrvînt en Jèrri. Lé p'tit John pâssit raîque 2 journées à l'êcole; lé deuxième jour, i' mordit l'maît et auprès chenna i' fut êdutchi à la maîson. I' mouontrait du talent dans la dessinn'nie.

La fanmil'ye èrmuit à Londres et à l'âge dé 11 ans, John fut enrouôlé dans l's êcoles d'l'Académie Rouoyale. Pouor l'âge dé 16 ans, la vendue d'portraits au janne John payait les dêbours du mênage. À l'âge dé 17 ans san preunmié portrait fut atchilyi à l'Exhibition d'l'Académie. Auve sén anmîn, William Holman Hunt, i' fondit la Fratèrnité des Pré-Raphaëlites. San portrait d'1849 Lé Christ siez ses pathents êmoûtchit du d'bat dans l'monde artistique.

Pouor 1859 i' changit d'manniéthe – ses portraits d'vîntent pus populaithes et i' d'vînt hardi riche. La Jannèche dé Raleigh est eune exempl'ye dé ses portraits historiques – et mouontre sén întéthêt dans ses réchinnes Jèrriaises. I' pâlait Jèrriais auve ses anmîns d'Jèrri et partitchuliéthement auve Lillie Langtry quand i' fit san portrait; dans L'Ordre d'èrlâche (1853) i' copyit la sîngnatuthe d'Tomkyns Hilgrove Turner, Lieut'nant Gouvèrneux d'Jèrri en 1815; i' fit eune illustrâtion d'Wace pouor un livre dé Jean Sullivan.

En 1855 i' s'mathyit auve Euphemia (Effie) Chalmers Gray dé tchi l'mathiage auve John Ruskin avait 'té scandaleusement annulé. Il' eûtent 7 êfants.

En 1853 i' d'vînt un Parchonnyi d'l'Académie Rouoyale; en 1863 un Académicien. En 1885 i' d'vînt un Baronnet. En 1896 i' d'vînt l'Président d'l'Académie Rouoyale, mais un mauvais ma d'la gorge fut dêcouvèrt ch't' année-là et i' mouothit l'13 d'Août. I' fut entèrré dans la Cathédrale Saint Paul à Londres.

Commons-logo.svg

Y'a acouo d'tchi à vaie ou à ouï entouor
John Everett Millais
siez la C'meune à Ouitchimédia