Saint Dunstan

De Wikipedia
Sauter à la navigation Sauter à la recherche
Ch't' articl'ye fut c'menchie en Jèrriais Jèrriais


Dunstan et l'dgiâbl’ye par George Cruikshank

Dunstan 'tait un saint Angliais. Avant dé dév’nîn Archêvêque dé Cantorbéry en 959, Dunstan ‘tait forgeux dans lé p’tit village dé Mayfield dans l’Sussex en Angliétèrre.

dgiâbl'ye avait mal ès pids en trotinnant ‘chîn et là l’travèrs d’l’Angliétèrre à faithe san mauvaîtchi, et en pâssant par Mayfield i’ décidit dé s’faithe féther. Il entrit dans la forge et Dunstan s’accordit à condition qué l’moussieu sait attatchi à la muthâle atout des chaînes duthant l’opéthâtion.

Mais Dunstan fit tant d’ma au Vièr Nic en m’ttant les m’nottes et les chaînes qué l’dgiâbl’ye piaillait pitchiâbliément et d’mandit à Dunstan d’l’èrlâchi. Dunstan, tchi n’tait pon un innouothant, fit l’dgiâbl’ye juther qu’i’ n’entréthait pon dans eune maîson à tchi qu’i’ y’avait un fé dé j’va sus la porte. Et l’Pid Froutchi juthit et fut libéthé.

Ayant rêalîsé qué l’forgeux ‘tait un bouôn Chrêtchien, l’Malîn ‘tait si mârri qu’i’ décidit dé l’tritchi.

Un jour, eune belle hardelle vînt l’vaie Dunstan dans sa forge, et s’mînt à faithe des teurs pouor l’distraithe dé ses priéthes et pouor lé séduithe. Dunstan n’lî faîthait pon d’attention, et la hardelle frustrée donnit un p’tit co d’pid. Mais en piétinnant, ou rêvèlit ses pids froutchis. Ch’tait l’dgiâbl’ye en dêdgîthement.

Un fé dé j'va clioué à l'us pouor la bouonne chance

Dunstan prînt ses pînchettes dé d’dans l’feu, rouoges coumme du fé, et pînchit l’nez d’la hardelle.

Auve un grand bueûlement, lé dgiâbl’ye s’envolit jusqu’ès Fontaines dé Tunbridge où’est qu’il èrfraidgit san pouôrre nez roussi. Et, à chein qu’nou dit, v’là tch’explyique les rouoges ieaux des fontaines là-bas.

Les cheins tchi vîsitent Mayfield au jour d’aniet peuvent vaie des pînchettes, souô-disant dé Dunstan.

Né v'là pouortchi qu’nou clioue un dé j’va à l’us à seule fîn dé s'garder du ma. Ch'est eune vielle crianche.

La Saint Dunstan est l'dgiêx-neuf dé Mai.