Hâvre des Pas
Ch't' articl'ye fut c'menchie en Jèrriais
|
Lé Hâvre des Pas (
Hâvre des Pas) est eune baie dans la Vîngtaine d'la Ville à Saint Hélyi en Jèrri. La baie s'êtale dé La Collette au Vouêt jusqu'au Di à l'Êst.
S'lon la crianche la Vièrge Mathie laîssit l'empreinte d'ses pids dans un rotchi au bord d'la mé. Eune chapelle fut bâtie et dêdiée à Not' Danme des Pas. Lé hâvre tch'abriait des batchieaux et un p'tit village ès pêtcheurs au pid du Mont d'la Ville fut bâptîsi pouor l'nom d'la chapelle.
La chapelle fut dêmolie en 1814. Les berrèxes ès mathiés (pouor les soudards du Fort Régent) fûtent bâties là, et pus tard l's appartéments d'La Collette dans la Vèrte Rue.
Eune îndustrie d'bâtithie d'batchieaux dév'loppit au Hâvre des Pas duthant l'19e siècl'ye. Lé chantchi à Âyie fut transformé en par en 2003 auve un monument d'baté à seule fîn d'ramémouaither ch't' îndustrie dispathue.
Duthant les temps Victoriens Lé Hâvre des Pas d'vînt eune pliaiche faîchonnabl'ye auve des hôtels et d's êtablyissements d'bains. Un musée mathitînme fut fondé ichîn. Parmi les vîsiteurs y'avait Victor Hugo tchi d'meuthait avaû la côte à Marine Terrace. Sa douoche Juliette Drouet d'meuthait au Hâvre des Pas, et Hugo soulait s'assiéthe su un rotchi au Di tch'a nom achteu Rotchi ès Proscrits.
La pièrre du Millénaithe dé Saint Hélyi fut mâtée au bord d'la mé en 1999.
Lé Hâvre des Pas a 'té încliu dans la protection dite Ramsar pouor la qualité d'sén envithonnement mathîn.
La bangnérêsse
[amendaer | modifier le wikicode]Lé Jersey Swimming Club fut fondé en 1865 à la siette d'la mort dé deux garçons n'yés au Hâvre des Pas. Lé clobe avait coumme ieune d'ses fîns la sauv'té en mé et l'amendement des pliaiches à s'bângni à Saint Hélyi. La bangnérêsse du Hâvre des Pas fut ouvèrte par l'Gouvèrneux d'Jèrri l'22 d'Mai 1895. Un café et d'aut's amendements fûtent ajouôtés en 1927. Pouor bein d's années l'alanchie attriotchait bein des gens. La bangnérêsse fut r'nouv'lée en 2001.
-
La bangnerêsse veue du pont -
L'architectuthe modèrne d'la bangnerêsse -
L'architectuthe modèrne d'la bangnerêsse
Littéthatuthe
[amendaer | modifier le wikicode]
Jean Sullivan êcrivit eune poésie en 1830 entouor la chapelle "Un mot à la Capelle de noutre Dom'-des-Pas".
- Oh, quand j'étais tout p'tit, en m'promnant ov m'en père,
- D'viers le Havre des pas;
- J'allions à tan roquir, im'contait ten histouaire,
- En me montrant tes Pas.
