Léninne

De Wikipedia
Sauter à la navigation Sauter à la recherche
Ch't' articl'ye fut c'menchie en Jèrriais Jèrriais


Léninne duthant la Preunmié Dgèrre Mondiale

Léninne (Lénine) 'tait l'mênom ou nom-d'dgèrre dé Vladimir Ilitch Oul'yanov (Владимир Ильич Ульянов, 1870 - 1924), un révolutionnaithe et l'chef d'la Révolution Russe au mais d'Novembre 1917.

I' fut né à Simbirsk (au jour d'aniet r'bâptîsi Oul'yanovsk) en Russie lé 22 d'Avri 1870. En 1887 san fréthe fut exétchuté pouor aver complioté contré l'Tsar Alexandre III, et Vladimir fut fliantchi hors d'l'Unnivèrsité pouor ses activités politiques.

En 1891 i' s'qualifyit coumme êcrivain, mais s'lanchit dans un mêtchi d'révolutionnaithe. I' fut blioutchi pouor un an en 1895 épis renv'yé en Sibéthie. I' s'mathyit en 1898 mais li et sa bouonnefemme Nadejda Krupskaya n'eûtent pon d'êfants. I' prînt l'mênom Léninne tchi veurt dithe d'la riviéthe Léna.

En 1900 i' c'menchit à viagi en faîthant d'la propagande commeuniste et publiant eune gâzette Iskra (êtînchelle). Quand l'parti Social-Démocratique s'dêmathyit en 1903, i' d'vînt la tête d'la mâjorité (les Bolchéviques) – la minnorité 'tait les Menchéviques.

Ayant pâssé l's années d'la Preunmié Dgèrre Mondiale hors Russie, il èrvînt à Saint Pétersbourg3 d'Avri 1917 auprès la tchête du Tsar duthant la Révolution du mais d'Mar 1917. S'n arrivée en Russie par train fut aîdgi par l's Allemands tch'espéthaient la r'traite des troupes Russes.

Il êtibotchit un co d'êtat au mais d'Juilet tch'eut êché, Léninne eut à êcapper en Fînlande. Il èrvînt au mais d'Octobre et chutte fais-là, les Bolchéviques lanchîtent un co d'êtat tch'èrmuit lé gouvèrnément pouor achteu. Lé 8 d'Novembre Léninne fut nommé président du Conmité des Commissaithes du Peupl'ye et împôsit eune politique commeuniste sus l'pays.

La Dgèrre Civile Russe (1918-1921) quémenchit. Lé 20 d'Août 1918, la dêmouaîselle Fanny Kaplan tithit trais boulets dans Léninne – i' n's'èrdgéthit d'aut' tout à fait d'la tith'thie.

Au mais d'Mai 1922 il eut un co d'sang tchi l'laîssit estropié. Auprès un deuxième co d'sang au mais d'Dézembre i' r'nonchit san travas, mais la siette d'un traîsième co l'mînt sus l'cârré. I' mouothit l' 21 d'Janvyi 1924.

En sa mémouaithe, la ville dé Saint Pétersbourg fut r'bâptîsie Lénîngrad et un tas d'pliaiches èrchûtent san nom et des statues d'Léninne fûtent êrigies par touos les bords dans l'Unnion Soviétique, et pus tard dans les pays commeunistes.


Nou décidit d'prêsèrver l'corps à Lénnine, et un maûsolée fut bâti dans la Rouoge Pièche à Moscou par les muthâle du Krémlîn où'est qu'sa monmie est acouo exhibée, ouaithe qu'i' y'ait ieu des suggestchions avaû l's années d'pis la tchête dé l'Unnion Soviétique qué Léninne dév'thait êt' à la fîn entèrré s'lon san d'si.