Gal'lie nâtionnale

Ch't' articl'ye fut c'menchie en Jèrriais

À Bèrlîn la Vielle Gal'lie Nâtionnale (Alte Nationalgalerie) s'trouve sus l'Île ès Musées; la collection d'art modèrne est exhibée dans la Neuve Gal'lie Nâtionnale (Neue Nationalgalerie)

Eune gal'lie nâtionnale est eune collection d'portraits, d'stchulptuthes et ofûche d'aut's objets d'art dans un bâtisse ou des bâtisses. La gal'lie nâtionnale est eune partie d'l'héthitage d'un pays ou d'un êtat et ch'est un sŷmbole d'la tchultuthe du pays. Eune gal'lie nâtionnale est fondée à seule fîn d'exhiber l'art tch'est la propriété d'l'êtat au publyi, mais la gal'lie nâtionnale peut mouontrer étout d'l'art emprunté et d's exhibitions temporaithes. Dé couôteunme la gal'lie nâtionnale s'trouve dans la capitale d'un pays.

Dans des pays y'a des gal'lies nâtionnales tchi soulaient êt' des gal'lies rouoyales ou des collections rouoyales transféthées dans des gal'lies ouèrtes au publyi. V'là tch'est bein souvent l'cas auprès la tchête d'eune dŷnnastie quand les beins rouoyaux sont gaffés par l'nouvel êtat. Autrément eune collection rouoyale peut êt' ouèrte au publyi par l'rouai. D'aut's gal'lies nâtionnales ont 'té fondées par un gouvèrnément, et y'a des gal'lies fondées par des sociêtés tchi sont dév'nues des gal'lies nâtionnales avaû l's années.

Dans des grandes villes historiques y'a des gal'lies bein fanmeuses tchi n'sont pon des gal'lies nâtionnales car la ville n'est d'aut' eune capitale - La Gal'lie d's Offices à Fliorence par exempl'ye est ieune des grandes gal'lies en Italie, mais l'Italie a un tas d'gal'lies d'même car l'pays fut unnifié raîque au 19^e siècl'ye. En Russie, Saint Pétersbourg et Moscou ont touos les deux des grandes gal'lies mais i' n'y'a pon d'gal'lie dite nâtionnale.

Tout coumme, y'a d's êtats formés d'nâtions tch'ont pus d'eune gal'lie nâtionnale. En Tchécoslovaquie, y'avait des gal'lies nâtionnales à Prague et à Bratislava tchi sont achteu les gal'lies nâtionnales des deux êtats îndépendants, d'la Tchéquie et d'la Slovaquie.

Des gal'lies dites nâtionnales

• Gal'lie Nâtionnale, Londres (National Gallery, fondée 1824)
• Gal'lie Nâtionnale d'Irlande (National Gallery of Ireland)
• Gal'lie Nâtionnale du Cannada (National Gallery of Canada / Musée des beaux-arts du Canada)
• Gal'lie Nâtionnale d'Êcosse
• Gal'lie Nâtionnale d'Art, Washington DC
• Gal'lie Nâtionnale d'Australie
• Gal'lie Nâtionnale d'Norouague (Nasjongalleriet )
• Gal'lie Nâtionnale Slovaque (Slovenská Národná Galéria)
• Gal'lie Nâtionnale à Prague (Národní galerie v Praze)